政情：沈慧林三代同堂一歲女最冧爺爺
小朋友一向都係爺爺嫲嫲嘅心肝寶貝，香港福建社團聯會青委常務副主任沈慧林（William）講起，最近三代同堂幫爸爸慶祝六十二歲生日，一歲幾嘅女兒識叫爺爺，氹到佢爸爸勁開心，自己同太太就送鬚刨，因為爸爸有大鬍鬚。
唔覺得港孩普遍
女兒咁識做，爺爺自然好錫佢啦。William話，女兒一向都好識冧爺爺嘅，所以佢爸爸每日返工前都會睇吓孫女，一有時間又會同佢一齊玩。咁女兒會唔會做錯事就向爺爺求救，等自己唔會被罰？William就話，女兒仲係太細，都未有呢個情況，依家教女最主要係教佢有禮貌，一定要同人打招呼，講「謝謝」。
講起依家好多小朋友都被人話係「港孩」，William就唔覺喎，佢話，自己平日帶女兒去playgroup，都唔覺得有港孩吖，多數都好有禮貌咁話。