政情：港鐵四線齊冧 范國威緊急質詢改字眼博入閘

建制罕有支持 內會獲通過

港鐵今年初開始喺荃灣線同東鐵線進行夜間更換信號系統全線測試，預計要到二○二六年先會全面完成整個信號系統提升工程，換言之，未來十年隨時都可能再有冧線問題。上周二冧線當日，Gary已去信要求提緊急質詢，話擔心短期內會再次出現同類型事故，認為事態急切，立法會有充分理由透過急切口頭質詢，要求政府及港鐵盡快交代詳情。

Gary嘅要求雖獲得部分建制派支持，成功喺內會通過，但仍要「打大佬」得到梁君彥批准。梁尋日喺傳媒午宴上被問到會否批出此項緊急質詢時，就話大原則係件事係咪真緊急，認為現時字眼大都有關索取以往的資料，以及當天頭班車開出前有否制訂任何應急方案等，所以批唔批就要視乎Gary會否修改字眼。

梁君彥未裁決 稱「唔夠緊急」

問番Gary最新情況，佢就話上周五內會後，已根據秘書處建議修改部分字眼，並遞交修訂本，正等候裁決。佢又重申，港鐵隨時會再冧線，完全不能理解政府點解可以接受港鐵得十部接駁巴士，上次事故仲要無開，問題需要盡快解決，而質詢修訂本只係改用更準確字眼去表現緊急性。

據了解，主席喜歡幾時裁決都可以，上屆立法會曾經試過到開會前先有決定，所以一切還看梁君彥喜惡。現屆立法會任期已踏入第三個立法年度，大大話話都有十幾次議員要求提緊急質詢，可惜每次梁都話「唔夠緊急」唔批准。唔知今次Gary可否成為零的突破？