中環出更：立會足球隊名單出爐 梁志祥掛靴虛驚
隨住新一個立法會年度開始，立法會足球隊又要重新組隊，報名嘅限期昨日屆滿，一共有十一名議員參加，啱啱好夠數湊夠一支足球隊正選陣容。不過，向來係足球隊重心嘅議員梁志祥（祥哥）竟然無加入到，唔通佢掛靴？
上年立會足球隊同旅遊業界代表嘅友誼賽中，祥哥上演「大四喜」，帶領球隊獲取大勝，如果今年無咗佢，相信球隊實力一定大大削弱。不過，祥哥並非掛靴，佢話尋日朝早先同一班波友踢完波，仍然維持住每星期一、五早上踢波嘅良好習慣。
報名有甩漏 會後補加入
祥哥仲話，都唔知自己唔喺球隊名單中，估計報名時有甩漏，佢會後補加番入足球隊，但應該要等足球隊隊員互選召集人，再經投票決定畀唔畀佢加入。佢仲講笑話，每場比賽開支由所有隊員同埋參與嘅議員共同分擔，而且以往比賽外援多數都由佢去搵，所以估計其他隊員都會好歡迎佢加入球隊喎！
卓妮