中環出更：陳勇收養走私龜倡重視動物福利
香港城市大學早前舉辦「動物大觀園」展覽，以糅合古今嘅方式嚟探索動物世界。講起養寵物，有份出席開幕式嘅新界社團聯會理事長陳勇就分享一個特別嘅經歷，話說佢曾經收養一對被海關沒收嘅走私印度星龜，點知只係一年時間即病逝，原來係有人為求走私順利而落咗藥，諗起都覺得痛心。
陳勇話，呢一對印度星龜好似雞蛋咁大，佢為咗收養仲要通過嚴格嘅資格審查，例如要訂購恒溫箱供一對小龜舒適過活，亦要承諾絕不轉售或棄養。成功收養後就由佢同囝囝一齊肩負寵物主人嘅責任。小龜突然抱恙後，就算佢付出高昂診金求醫，最終都係不治離世。呢段經歷令陳勇十分不齒走私客嘅手段，覺得有必要完善保護動物嘅法例，提倡重視動物福利。
劉燕卿撐「健康一體化」
申訴專員劉燕卿都有到場，佢都有飼養寵物嘅經驗，曾經養咗七隻兔仔。最令佢難過嘅係，有日發現其中一隻兔仔眼球凸起，獸醫診斷係腦瘤所致，結果要人道毀滅。佢好贊同衞生專家倡議嘅「健康一體化」概念，即同樣重視人類同動物嘅健康，以免共患傳染病。
講番今次展覽，主要係台北故宮博物院借出嘅典藏，該院副處長謝俊科話，今次展品以球形地圖呈現嘅坤輿全圖及坤輿圖說最有欣賞趣味，因為呢件展品除咗描繪山川地理，亦介紹各地珍禽異獸，如獨角獸同人魚等傳說中嘅生物，反映四百年前人類喺欠缺科學資訊下，只係靠傳聞來認識動物世界。
卓妮