好多人都知，第一屆維港渡海泳喺一九○六年舉行，至今已有過百年歷史，近年復辦更成為城中盛事，淨係今年咋，吸引咗三千六百人參加，連高官名人都落水一試身手，點不知海中油味極重，更有不少垃圾阻住賽道，真係大殺風景。
話時話，渡海泳曾經數度停辦，當年就話香港淪陷，近年則因為水質淪陷，你話醜唔醜吖。係呀，維港污染早就唔係新聞，畀人鬧得多，港府不得不展開「淨化海港計劃」，第二期工程亦喺三年前全面啟用。環境局局長黃錦星沾沾自喜咁話，淨化計劃持續提升海港環境及親水活力，軟珊瑚群已重現維港，未來會繼續努力喎。
官老爺講到維港水質大躍進咁款，事實係點，等參賽健兒話畀大家知喇。嗱，完成優悠組賽事嘅梁先生一上水就滿肚怒火，事關水中有唔少垃圾同膠袋，阻慢速度，影響表現；青少年組別兩位小將就仲激動，鬧爆沿途水質同往年一樣油味極重，而且好攻鼻，聞到有啲想暈，你話死唔死吖。
仲有喎，十二歲起年年參賽嘅少女泳手直言，維港水質年年都係咁差，早就冇期望；亦有泳手認為山竹襲港後令水面垃圾更多，形容維港出名臭，呢啲咪叫中肯囉。再睇吓今屆賽事有多人被割傷，維港到底有幾藏污納垢，唔使問喇。今年渡海泳主題係「我不怕浪，我就是浪」，家陣健兒與油污同行，改成「我不怕臭，維港就是臭」就差唔多。
諗落又冇乜出奇嘅，港府搞環保不嬲大隻講，否則香港每年嘅海洋垃圾就唔會多達一萬五千噸，垃圾海灣仲由廿七個增至廿九個；至於屯門河臭味擾民、城門河火炭明渠死魚漂浮，甚至變成綠色「螢光河」等醜聞更係數極都數唔完。又好似前排山竹襲港吖，大量海洋垃圾沖晒上岸，連廿幾年前嘅快餐店發泡膠盒都「文物出土」，證明唔止港府從來冇的起心肝處理海洋垃圾，市民、商界胡亂棄置垃圾嘅問題同樣好嚴重。
講起山竹襲港一役，港府善後嗰鋪雞手鴨腳，真係令人火都嚟埋。斷樹殘枝固然滿街滿巷，災後一個幾月都仲未收拾殘局，更大鑊係西貢污水處理廠遭受重創，污水糞水長流大海，邊個敢擔保嗰啲糞水污水唔會污染維港吖，唔好話落水暢泳，諗一諗都惡心喇！
一句到尾，工欲善其事，必先利其器。游泳有益身心，維港景色優美，港府重推渡海泳梗係無任歡迎，但都要水質見得人吖，拜託黃局長咪掛住吹水，加多兩錢肉緊做嘢先喇。