政情：今日你上鏡：柯仔激嬲老婆罰扭耳仔？

唔少人做錯事，或者激嬲咗身邊伴侶，都會扭耳仔認錯，立法會議員柯創盛（柯仔）日前喺社交網站Facebook上載咗張相，仲叫大家估吓佢做乜？張相疑似係耳仔喎，唔通佢做錯事，激親老婆？望真啲，其實柯仔玩緊3D相，雙手唔係扭住耳仔，而係塞緊耳塞入去，由於3D相可以左右郁動，所以驟眼睇起嚟好似扭耳仔咁啫！至於點解佢要用耳塞，原來係佢拍攝保護聽覺小貼士嘅短片，佢仲話呢幅相係從未出街嘅拍攝花絮喎。