政情：平權活動冇陳章明 慢必暗批唔邀花瓶
平等機會委員會主席陳章明任期將於明年四月屆滿，唔少人對佢任內表現不滿。佢上任以來經常獲邀出席支持同志平權活動，但今年就唔見影，仲畀早已「出櫃」嘅立法會議員陳志全（慢必）暗示佢係花瓶，到底係咩原因？
指出席不該為影相交功課
尋日有一個支持同志平權活動，但係就唔見陳章明身影，慢必就話冇邀請佢嚟，仲形容係破例嘅做法。佢忠告有意申請出任平機會主席嘅人士，唔應該只係當一份工或者做一個「花瓶」，出席支持平權活動後影相交功課就算。如果個主席只係當打份工，冇為性小眾人士改變政策，盡力爭取權益，就唔會容許該「花瓶」出席活動，句句暗批陳章明咁喎！
支持同志平權嘅前立法會議員何秀蘭亦批評，陳章明喺早前高級入境事務主任梁鎮罡申請司法覆核，要求其同性婚姻配偶可享公務員家人福利及共同評稅嘅案件上，並冇譴責政府，所以冇必要畀佢出席喎。