中環出更：有病唔使怕 象哥教中西醫合璧
現代人愈嚟愈注重養生，唔少人都會專登去搵中醫調理身體。卓妮尋日出席工聯會嘅流動中醫服務啟動禮時，主禮嘉賓兼立法會進出口界議員黃定光（象哥）就分享經驗，話西藥治療速度夠快，即時見效，但有時候感冒好番仲有咳，咁就要轉睇中醫用中藥清走病根，實行雙管齊下！
象哥為咗推動中醫服務出咗唔少力，包括穿針引線搵到朱國基慈善基金捐贈第四部流動中醫車，為基層市民提供中醫服務。朱國基笑笑口話，自己好好彩冇乜病痛，日日早晚運動，唔該食就唔食，仲話自己同象哥一樣工作好忙，唔可以咁易病㗎喎。
黃國鍾意食中藥粉
工聯會副會長梁頌恩就呻身體太敏感，以前經常食完中藥後有腹瀉，所以睇得最多係針灸同跌打。不過，佢早排膽粗粗試吓服用中藥粉，發現冇事兼唔苦，連嘉應子都唔使食。工聯會理事長黃國都好鍾意食中藥粉，仲話以前煲藥時間耐，食粉裝方便好多，又話西藥雖然效果快，但係「霸道」，食親個人都好散，近年都轉睇中醫，而且中藥對長期病患治療效果顯著。
另外，本身係精神科醫生嘅立法會前勞工界議員潘佩璆就笑住話，「我冇睇中醫，但有食中藥」，嚇到現任勞工界議員何啟明「吓」咗一聲，問佢係咪自己開藥方。潘解釋，五年半前患上大腸癌，之後經中醫調理覺得身體幾好，所以一直有食中藥，就連平時咳都係食川貝枇杷膏添，覺得中西醫各有各好處。
卓妮