香港人凡事講求實際，「守護荷包」就係最好嘅「守護我城」。施政報告提出「明日大嶼」願景激起群情洶湧，除咗萬人上街示威，仲有逾兩萬人聯署反對。無他嘅，特衰政府搞大型基建例牌延誤超支，填海大計攞成個香港嘅儲備嚟較飛，市民唔緊張就假。
咁點解高官吹到天花龍鳳，話造人工島計劃可以為一百一十萬港人提供居所，最快十四年後提供首批單位，市民死都唔信？好簡單，風水佬就話呃你十年八年，港府嘅顢頇無能一早已經現形，唔使講十幾年咁遠，淨係講颶風山竹善後工作就夠。
呢嗱，個風走咗整整一個月，市面唔少地方仲係一片頹垣敗瓦，斷樹殘枝搖搖欲墜，居民出入提心吊膽，部分偏遠離島居民至今仍然缺水缺電。其中一個重災區、有「香港後花園」之稱嘅西貢，區議會尋日開會討論政府各部門善後工作進度，有區議員就反映將軍澳海濱長廊以磚及沙石鋪砌，不堪一吹，地區人士一直要求土木工程拓展署為長廊進行加固工程，點知對方一味話設計符合標準，大派定心丸，結果山竹殺到，當堂冚包散咁滯，部分長廊吹剩面嗰浸磚，底下空洞超過一米，萬一有人不慎墮入陷阱，後果不堪設想。
最惡頂係，急驚風偏偏遇着慢郎中，土木署官僚話正安排維修石築海堤，預計可以喺下年風季前完成有關工程。喂，家陣又唔係講緊登月工程，使唔使搞成年咁耐呀，你不如同人講，橫掂豆腐渣長廊遲早畀風徹底吹爛，不如等下次風災後一次過重建乾手淨腳吖，笨！有區議員就講得啱嘞，港府連小小海濱長廊都搞成咁，何德何能搞得掂大嶼山人工島？將一個開埠以來規模最大嘅基建工程由得班廢官舞，同倒錢落鹹水海冇咩分別，香港人如果咁都落疊，就真係「今日大愚」嘞！
當然喇，海濱長廊嘅災後亂象只係冰山一角。有地區人士投訴政府辦事衙門清理塌樹各自為政，淨係派人清理枯枝，倒塌樹幹卻遲遲未有人跟進。查實呢個問題已經講咗n咁多年，試過有塌樹樹頭壓喺公眾街道，樹腳壓喺公園裏面，結果食環署、路政署、地政總署、康文署等多個部門互相扯皮，拗一大輪都冇人肯認頭，簡直吹脹！
一句到尾︰與其有錢身痕，不如還富於民。之前有學者建議港府花幾百億元啟動全民退保，港府死都唔肯，偏偏係都要冇咁大個頭戴咁大頂帽，學人搞填海造島，結果全民圍插，睇怕「明日大嶼」最終都係淪為「明日黃花」嘅嘞。