政情：葉劉幫腔撐性小眾 慢必冧爆
近年愈嚟愈多人為性小眾爭取平權，但傳統派就擔心會對現行一夫一妻制造成衝擊，令爭議不斷。立法會議員葉劉淑儀就話，依家好多人都做唔到一男一女終身結合，根本同性小眾人士無關，覺得政府唔使猛講要維護一夫一妻制囉。此番言論一出，令已「出櫃」嘅議員陳志全（慢必）冧晒，拍爛手掌，仲話想即刻上前攬住葉劉添啊！
尋日立法會政制事務委員會開會，討論今個年度嘅工作。慢必發言時批評，政府喺施政報告中提及消除性傾向同性別認同歧視，話要致力維護現有一男一女、一夫一妻嘅婚姻制度，對於性小眾而言，好似已經落咗閘，好失望。
直言要教育大眾唔好歧視
葉劉發言時擺明車馬支持慢必，話政府唔使夾硬提維護一夫一妻制，呢個傳統婚姻制度喺現代社會已受到好多衝擊，好多夫婦都做唔到終身一齊或者無第三者，所以不同性傾向唔係病，直言要教育大眾唔好歧視喎！葉劉講得咁啱聽，難怪慢必咁開心喇！
