政情：坐高鐵冇證通關 鄧忍光僅認論盡
廣深港高鐵香港段喺上個月正式開通前一日，部分官員同議員一齊搭高鐵上廣州搞開通儀式。事隔大半個月，政制及內地事務局常任秘書長鄧忍光被踢爆，回程時唔見咗身份證同回鄉證，最後用嘉賓證及實名車票過關返港。鄧忍光尋日出席立法會會議時，回應話自己「論盡」，又強調旅客應該要聽內地口岸人員嘅指示，做足所有應該做嘅事喎！
田北辰批不應接受特別優待
事發當日，鄧忍光發現唔見證件後，返到香港即刻去警署報案。同日下午，有港鐵職員喺車廂內執到鄧嘅證件交畀警方，最終銷案。實政圓桌田北辰就批評話，高官應該要「嚴己」同「三思」，唔應接受同職務無關嘅特別優待。而工聯會麥美娟更趁機抽水，笑稱如果鄧忍光下次再唔見證件，可以搵工聯會，好快就可以幫到佢喎。
不過話時話，用「論盡」解畫好似唔多講得通，將來市民係咪都可以用「論盡」做理由，用車票過關？