政情：單雙牌頭都輸 鄧家彪翻身唔易
前立法會議員鄧家彪（Bill）因為工聯會（工記）嘅不成文規定，只做咗一屆勞工界議員，就轉戰新界東參加直選，不過兩次挑戰都無功而還，其中今年初更加祭出絕招，加多一個民建聯（民記）牌頭出選，但係都無改敗選命運。立會下一屆選舉兩年後就會上演，到時Bill又要為牌頭問題而苦惱，但似乎單、雙牌頭分別不大，前路都一樣咁難行囉！
Bill現時為離島區議員，不過亦都兼顧埋沙田水泉澳事務，事關佢要落戶新界東。佢已經兩次參加新界東直選，其中今年初嘅補選，更以工記同民記雙牌頭姿態出戰，但係都同議席擦身而過。近年工記同民記愈走愈近，唔少工記地區人士都考慮申請雙牌頭，不過立法會層面就未有呢個情況，只有Bill係特例。
工記力有不足 民記憂失選票
二○二○年換屆選舉臨近，工記中人預料，屆時Bill只會用番工記牌頭出選，因為年初補選以單議席單票制方式，先會有雙牌頭嘅實際需要。而且民記現時已經有兩個新界東議席，其中一個與Bill一樣扎根沙田，票源重疊，所以估計民記最終都會優先保住兩個親生仔女，雙牌頭對Bill喺換屆選舉嘅選情幫助有限，所以預料都係用番工記牌頭。
不過追溯番Bill變雙牌頭，就係有民記成員覺得無理由過票予他人，擔心選票一借冇回頭，所以催生鄧家彪以雙牌頭姿態出戰補選。但萬一Bill又變番單牌頭，情況又倒流返去二○一六年，單靠工記樁腳難以送佢入立法會嘅局面，所以齋用工記牌頭定繼續雙牌頭好，相信呢個問題有排纏擾Bill喇。
現時新界東同新界西都各有九席，但建制派喺呢兩區表現相差甚遠，可以喺新界西完美配票豪取五席，另一邊廂嘅新界東，就連續兩屆只取得三席，其中工記一直徒勞無功，未有突破。
然而，新界東中嘅民記葛珮帆同陳克勤極為吸票，如果能夠好似新界西成功配票，的確有機會為建制派爭取多一席。所以有建制派認為，就算有人幾緊張選票，為大局着想都要有所協調，故此，Bill喺二○二○年嘅選情仍然樂觀喎。