中環出更：今年度首主持會議 范國威甩轆遲到
今個立法年度正式開始，十八個事務委員會都已經喺上星期選出正、副主席，其中議員范國威就當選公務員及資助機構員工事務委員會主席，首次會議喺尋日舉行，但范國威竟然遲到，搞到一開波就冇人主持會議喇！
會議原定早上十時四十五舉行，但夠鐘時范國威及副主席廖長江都唔見影。其他在場嘅議員開始議論紛紛，研究冇人主持點算好。議員郭偉強就話，可以即場選出一個代表主持會議，不過有議員就唔太確認咁做啱唔啱，最終要問秘書處職員點算囉。秘書處就確認郭偉強嘅說法，不過同時都補充話，范國威已經趕緊返嚟喇。
道歉稱由區會趕嚟
結果范遲咗五分鐘先出現，一入場就同議員講唔好意思，佢事後解釋話係由區議會趕嚟，完會又要返去作第二輪發言。不過遲到總好過冇到，廖長江就一直冇現身啦。
卓妮