中環出更：無懼樓市冧 嚴紀雯中半山 購婚後新居
癲升多年嘅香港樓市最近終於開始下跌，想做業主嘅買家入市態度明顯趨於謹慎。不過正籌備明年六月結婚嘅仁濟醫院總理嚴紀雯（Carmen）就無懼樓價大跌風險，啱啱喺中半山買咗新居打造安樂窩，佢話層樓用嚟自住，所以唔理升定跌。本身做地產嘅佢認為樓價跌極有限，就算跌兩成，長遠計，自住都唔怕嘅。
置業同結婚都係人生大事，照計應該忙到氹氹轉。Carmen就好淡定話同男友分咗工，佢負責籌備婚禮，新居設計就由男友負責，所以都應付得到。佢笑言原本想去外國舉行婚禮，不過依家決定喺香港擺酒。轉頭見到Carmen嘅爸爸、仁濟前主席嚴玉麟，唔知佢需唔需要為榮升外父做乜嘢準備，佢摸住個肚腩笑言要努力keep fit，唔可以喺婚禮上被未來女婿靚仔過佢太多喎！
葉恭正預告明年落場賽車
呢一日係沙田馬場舉行仁濟盃賽事，仁濟主席馮卓能、副主席葉恭正（Paul）等董事局成員都攜家帶眷去趁熱鬧。曾經係賽車手嘅Paul婚後已經好少落場比賽，改為帶旗下車隊到世界各地比賽。不過佢開心預告已取得太太嘅批文，明年會落場賽車。講起賽車嘅趣聞，咪以為車手喺時速二百公里以上嘅車上好緊張，要全神貫注咁專心開車，Paul話其實喺車內好悶，有時見到靚女或靚景，會用對講機同隊友或大偈分享添！
講講吓，仁濟前總理劉耀棠咁啱行過，佢笑住話睇住Paul長大，事關佢做副主席嗰間上市紡織公司嘅創辦人就係Paul父親，大家又先後加入仁濟大家庭，真係有緣分。
卓妮