稅季又到，相信大家收到「綠色炸彈」嗰下，都會同功夫茶一樣，激到頭殼頂出煙，事關呢個特衰政府錢就識收，嘢又唔做，納咁多稅養班廢柴，你話條氣唔戳住就假！
漢奸黎涉刑事恐嚇東方報業集團記者，事發至今超過十六個月，律政司仍然拖延唔肯做嘢。東方同受害記者前後十度去信追問進展，第十封信上周五寄出，律政司係就係即晚回覆，可惜又係通篇虛詞，廢話一堆，咩「警方向律政司徵詢法律意見」、咩「現階段不宜評論案件進度同處理手法」，講咗等於冇講，根本係侮辱香港人嘅智慧。
話時話，連曾蔭權爵士都識講「我要做好呢份工」，受害人都係納稅人，有份出糧畀班官，律政司辦案拖拉又拖拉，對受害者敷衍復敷衍，點對得住米飯班主吖。試吓換番轉市民拖延唔交稅吖嗱，莫講話十六個月，十六個禮拜都畀稅局追到褲甩。
其實成單畸士案情簡單，漢奸黎「×你老母×」、「我實會搵人搞×你」、「我影×咗你嘅相」，辱罵兼恐嚇記者，成個過程有圖有片，證據確鑿，有人吟詩都吟唔甩，律政司偏偏死拖爛拖，拖完再拖，到依家都未作檢控，話背後唔係有政治任務，又或者買咗漢奸黎背後嘅外部勢力怕，三歲細路都唔信。大家有眼睇，以前控煙辦、食環署、警方及消防處等多個衙門是但收到一個所謂「投訴」就雞毛當令箭，輪番上陣打壓東方，家陣東方及受害人十次致信律政司，對方居然翹埋雙手唔做嘢，睇你點死，睇你老土，唔係有心針對係乜嘢呀。正義傳媒畀漢奸黎踩到上心口，受害記者飽受驚嚇搞到要接受心理治療，律政司居然唔主持公道，唔單止違反《罪行受害者約章》，直頭違反埋《商品說明條例》，好心拿拿臨改名「亂政司」、「庇奸司」、「護淫司」喇。
一句到尾，木秀於林，風必摧之。正義傳媒為民喉舌，發揮第四權，踢爆政府無能，揭穿反中亂港勢力嘅陰謀，結果淪為漢奸洋奴眼中釘、肉中刺，東方遭針對，證明愛國愛港仍然係「原罪」。最令人百思不得其解嘅係，北大人呢頭話要壯大愛國愛港力量，港府嗰頭唱對台戲，千方百計壯大反中亂港勢力，對東方就羅織罪名，百般打壓，對壹淫媒漢奸黎就千般縱容，萬般包庇，教人見識乜嘢叫是非顛倒，黑白混淆，親者痛而仇者快。
哀莫大於心死，眼見反中亂港獲包庇，愛國愛港被拋棄，咁就唔怪得人心遲遲未回歸，亦唔怪得愛國愛港陣營士氣渙散，洋奴漢奸氣燄囂張！