政情：落區掃貨唔連戲 區諾軒換衫穿崩
近年市民愈來愈關注商場老舖或小舖結業問題，慨嘆想去買餸都無乜選擇。立法會議員區諾軒早前就同社區主任袁嘉蔚落區進行購物大作戰，期間仲拍片同市民分享「賽果」。點知區諾軒完全唔連戲，着咗兩件唔同色嘅恤衫，唔知係分開兩日拍，抑或係貪靚換衫呢？
拍片盼關注小舖結業問題
區諾軒尋晚喺社交網站專頁上載短片，同袁嘉蔚去三個已被領展出售嘅商場，包括東區興民邨商場、華貴坊同田灣商場，挑戰吓買唔買到元寶蠟燭、米、感冒茶、新鮮豬肉同出爐麵包。一開始區諾軒着咗件白波點嘅深藍色恤衫，兩分鐘後轉場時竟然變成淺藍色，袁嘉蔚就着番一樣款嘅一字肩白衫。
講番購物挑戰一啲都唔順利，事關好多商場都係十室九空，佢哋要轉戰附近地舖先買得齊嘢。不過，依家甚少家庭會買元寶蠟燭，唔知係咪因為臨近重陽節，驚市民唔知去邊入貨呢？