政情：出戰社工局改選 黎汶洛或成炮灰

社工局由十五名成員組成，當中八人由註冊社工選出、六人則由特首委任，另一人則由社會福利署署長或其代表出任，而局方係負責監察社工的素質，包括處理有關註冊同續期、社工違紀行為等。簡單而言，呢十五人把握香港社工嘅命脈，上屆八名直選成員，就由社總同較為激進嘅社工復興運動囊括晒。

根據社工局已確認嘅候選人名單，廿三人中約有十人屬於泛民主派代表。據悉，會有六人以社總牌頭參選，當中部分人競逐連任及少數新人上場；而上屆以社總身份參選嘅前公民黨成員曾健超，就改以獨立身份出戰；現屆成員兼立法會社福界議員邵家臻無報名，佢所屬嘅社工復興運動就派丁惠芳作代表。

無同社總溝通 自言贏面一半半

黎汶洛回覆查詢時話，依家仲讀緊社工學士學位，但早年修讀高級文憑時已註冊成為社工。過往甚少人會以學生身份參選，希望當選後可為社工學生爭取實習津貼。佢承認事前無直接同社總溝通過，但知道社工復興運動有同對方聯絡，佢評估自己贏面都係一半半，強調係想畀更多同工知道社工局做緊乜喎。

料難吸中年票源 與曾健超對撼

根據社工局最新數字，目前全港有約兩萬三千名社工，有知情人士分析，黎汶洛主打年輕票源，但每屆只有約兩成至三成人投票，主要為中年社工，所以黎極可能只得幾百票，未必跑出。該人士更估計，現屆成員以社總同社工復興運動為主，社總六人及丁惠芳贏面較高，最有可能係黎汶洛分薄曾健超票源，變成二人對撼。

黎汶洛本來喺一六年立法會換屆選舉出戰九龍東，最後因為眾志資金不足要放棄參選，自此甚少露面，佢更喺今年五月退出眾志，依家算係「無黨一身輕」。但突然插旗落社工局，又無親自同友好團體打招呼，隨時搞亂檔變成鷸蚌相爭，益咗對家就唔知點收科嘞！