中環出更：陳婉嫻黃國鬧爆政府縱容商界
近日商界就勞工議題有多個驚人言論，包括中華廠商聯合會會長吳宏斌提出將銀行假由十七日減至十二日，同勞工假睇齊；香港餐飲聯業協會會長黃家和就話，「山竹」襲港後一日，有荃灣員工無返葵涌開工，不能不扣錢。工聯會榮譽會長陳婉嫻（嫻姐）同理事長黃國分別批評政府縱容商界，對勞工嘅關顧不足，先至會接連出現無良嘅言論。
對勞工關顧不足
嫻姐話，近二十年政府養肥晒商界，先會出現吳宏斌呢啲怪論，仲點名批評立法會議員鍾國斌話，政府攞三百億元補貼取消強積金對沖仍然唔夠。佢認為行政會議等重要政府諮詢架構，「尖酸刻薄嗰啲就唔好搵佢啦！」陳愈講愈勞氣，話民間提過好多解決房屋問題嘅意見，但係佢懷疑有人同地產商一齊做嘢，令樓價癲升喎！
黃國就話，政府施政某程度偏向商界，畀僱主嘅利益好似碌柚咁大，畀勞工嘅就桔仔咁細，認為政府對勞工嘅關顧不足。例如打工仔假期分兩種，政府外判清潔工只得最低工資，係帶頭製造在職貧窮，希望政府可確實令各階層分享經濟成果。
卓妮