中環出更：做義工是福 李潔雲唔覺港人只講金
早前有調查指港人肯做義工嘅比例只得三成，更加有七成以上要僱主畀有薪假期先肯做義工，聽落好似只識講金唔講心。早幾日喺嗇色園舉行嘅黃大仙師寶誕晚宴上，卓妮同嗇色園主席馬澤華嘅太太李潔雲講開呢個話題，佢就話唔覺得港人咁冇愛心，反而佢身邊朋友個個都出錢、出力、出時間做義工，有啲仲貼錢幫人添！
李潔雲喺嗇色園做義工多年，經常同一大班義工去探訪獨居長者，或幫老人家完成夢想。佢話記得有一位長者想喺有生之年同老伴影張靚相，因為佢哋未影過婚紗相，於是有義工就出錢買埋化妝品幫兩老圓夢，見佢哋影相時好開心，自己都開心埋一份，所以話做義工是福。
馬清楠倡推動義工文化
保良局副主席馬清楠都話唔覺得港人要有回報先做義工咁現實，例如今次山竹風災後，好多人都自動自覺幫手清理家園。不過佢認為可以積極啲推動做義工成為香港文化，例如鼓勵小學生做能力所及嘅義務工作。
同場仲有身兼嗇色園董事嘅東華三院主席王賢誌、觀塘區議會主席陳振彬、身兼黃大仙區健康安全城市主席嘅中華廠商聯合會副會長史立德等人。王賢誌同史立德每年農曆大年初一都去黃大仙祠上頭炷香，陳振彬就笑稱自己唔係上頭炷香，而係初一、十五都去上香，不過上香只係一個儀式，「修心」更加重要。
近排頻頻出訪搵商機嘅史立德，啱啱同香港明天更好基金一班商界朋友去咗俄羅斯考察。佢笑笑口話係第一次去，不過已睇中當地旅遊商機，研究緊同朋友一起投資酒店添！
卓妮