政情：馬尼拉公幹被偷手機 徐珊雯六神無主
智能手機已經係好多人生活不可或缺嘅一部分，萬一唔見咗手機真係好頭痛。香港鐘表業總會前副主席徐珊雯（Elise）早幾日去菲律賓見客，喺馬尼拉機場一間餐聽等朋友嚟接機時，一個唔留神就畀人偷走咗部手機，跟住落嚟嘅日子真係苦不堪言喇。
Elise話，當時部手機用後備電池叉緊電，放喺隨身手袋上面當眼位置，佢嘅視線只係離開手機十幾秒就已經出事。之後佢即刻報警，諗住餐廳有天眼，可以令賊人現形啦，點知部錄影機係壞嘅，真係激氣。冇咗部手機，等於冇電話簿、冇即時通訊應用程式，嗰種唔方便真係難以形容。Elise苦笑話直情係「六神無主」。
幸好有做資料備份
好彩佢平時有做手機資料備份，所以返港後買番部新手機，好快就回復正常生活步調。原來今次唔係Elise第一次唔見手機o架喇，兩年前佢都試過一次，而嗰次仲慘，因為冇備份，正係嗰次經驗先令佢識得做好備份咋，不過佢就話呢種經驗寧願唔要囉。