政情：僅加入3個立會委員會 李國麟最懶惰
立法會將於下周四（11日）選出十八個事務委員會（委員會）嘅正副主席人選，而議員加入委員會嘅限期喺今日中午屆滿，截至尋日下午約五時為止，衞生服務界李國麟只加入咗房屋、衞生，以及食物安全及環境衞生三個委員會，暫時係全體議員中最少。
容海恩有孕都報咗11個
另外泛民四人包括民主黨鄺俊宇、街工梁耀忠、會計界梁繼昌及教育界葉建源，不約而同只係加入四個委員會。
值得留意嘅係已懷孕五個月、預產期明年農曆新年嘅新民黨容海恩，雖然事先張揚唔會出任委員會正副主席，惟佢都聽從建制派內部建議，加入咗民政等十一個委員會，外界一般相信，下周投票選完委員會正副主席後，容就會退出部分委員會。
至於一眾議員當中，暫時加入委員會最多嘅首三名議員，分別係全數加入十八個委員會嘅議會陣線朱凱廸，以及同樣加入十四個委員會嘅人民力量陳志全及律師會前會長何君堯。