政情：政府跪低元朗17億天橋無限期押後
造價十七億元、連接港鐵朗屏站嘅元朗高架行人天橋，因價格高昂而備受爭議，就連建築、測量、都市規劃及園境界立法會議員謝偉銓（Tony）都表明反對，結果天橋撥款就未能喺立法會上年度休會前得到財務委員會審批。立法會新一年度展開，政府尋日向財委會提交文件，話會喺適當時候先再將項目提交財委會審議，變相無限期押後。
謝偉銓歡迎政府做法
財經事務及庫務局喺提交嘅文件中指出，考慮到議員對項目嘅關注同社會各界嘅意見，政府正着手制訂緊推展工程項目嘅具體安排，由於相關工作仲進行緊，所以會到適當時候先再提交財委會。
對於呢個項目喺議程上被抽起，Tony就話歡迎政府做法，覺得係正面訊息，相信政府會真係參考同研究業界意見，然後作出調整。而佢都希望政府會從善如流，回應到業界要求，改善元朗人流問題。不過佢都唔想政府長期抽起議案，仲話如果過多一排，政府都未有消息就會跟進喎。