政情：陳振英角逐財會副主席 做泛民出氣袋當試練
立法會暑假休會將結束，下周三復會，尋日就率先召開內務委員會及財務委員會，並選出新立法年度嘅正副主席人選，當中只有財委會副主席換人，從直選議員田北辰改由金融界議員陳振英擔任。一直盛傳陳振英做財委會副主席係為接主席陳健波棒鋪路，所以尋日選舉財委會副主席期間，陳振英就畀泛民主派議員連番質詢，變相成為泛民出氣袋作試練，總算順利過關。
田北辰早喺七月休會前已經宣布放棄連任財委會副主席，而陳振英亦早被視為接任人選。陳健波喺會議較早時間率先成功連任財委會主席，以三十八票對廿一票贏咗會計界議員梁繼昌。之後嘅副主席選舉中，陳振英就獲建制班長廖長江提名擔任副主席，多名建制派議員都爭住舉手和議。
被連番質詢 代陳健波受靶
泛民為咗冇咁輕易畀陳振英當選，就再次推舉梁繼昌去挑戰，最後陳振英以三十五票比十九票大勝。梁連泛民基本票都攞唔足，因為泛民陣營嘅朱凱廸同梁耀忠遲到投唔到票囉！雖然陳喺票數上取得壓倒性優勢，但過程都唔好受，因為泛民向佢提出大量質詢，變成出氣袋。唔知係咪因為佢喺投票前話，會虛心學習陳健波點樣主持會議，而惹來不滿喇。
議員區諾軒批評，眾所周知陳健波最鍾意就議員發言劃線，「剪布」時話剪就剪，凡議案曾喺事務委員會討論過，就要縮減喺財委會嘅討論時間，擔心陳振英學晒呢啲嘢。議員范國威就問，若然陳振英當選後，見到主席違規主持會議又會點應對。講完主持會議嘅手法，「雙陳」嘅功能界別背景亦成為泛民嘅攻擊目標。
議員鄭松泰質疑財委會正副主席都由功能界別議員擔任，對審議財政並唔健康，更質疑田北辰唔再做副主席，背後係咪有其他原因。議員黃碧雲就借機批評建制派包攬正副主席，認為兩個位都食晒太霸道喎。陳振英慘成泛民出氣袋，某程度都係代陳健波受靶，但樂觀睇亦可以當作試練，事關將來要面對嘅場面可能惡劣過今次好多倍。
至於財委會前嘅內委會正副主席選舉，氣氛就和平得多，內委會正副主席同樣係冇挑戰下自動當選，分別由議員李慧琼同法律界議員郭榮鏗連任，其中郭未有出席會議都連任成功，而未來一年已經係佢哋第三年擔任有關崗位喇。