中環出更：港產陀飛輪錶芯出世黎衍橋喜獲新BB
鐘錶製造工藝博大精深，中國人想趕上歐洲水準仍要再接再厲。早前喺香港表廠商會一個晚宴上，卓妮見該會名譽會長蘇永強及會董熊漢生，同手上拎住一塊金屬物體嘅名譽會長黎衍橋（David）好好傾，原來一直落重本研發鐘錶技術嘅David又再報捷，成功研製陀飛輪錶芯。當日佢啱啱喺研發團隊手中攞到，即刻拎過嚟同好友分享。照咁講，呢個陀飛輪錶芯咪好似啱啱剪臍帶嘅BB？
David好雀躍話，呢個陀飛輪錶芯係同瑞士合作設計，研究咗四年終於喺香港出世，係名副其實嘅港產陀飛輪。今年初，David先至成功研發中國第一個達天文台級數嘅錶芯，佢形容今次係喺天文台錶嘅基礎上更上一層樓。蘇永強都戥佢開心，話政府成日話要打造「香港製造」品牌，呢個就真正係「香港製造」喇。
講番晚宴係慶祝該會成立五十周年兼新一屆董事會就職典禮，由會長林偉雄冧莊做多一屆。常務副會長高偉國擔大旗出任晚宴籌委會主席，現場布置好有心思，包括展示該會過去半世紀嘅發展及歷史珍貴圖片嘅時間長廊，該會永遠名譽會長張有興都睇得津津有味。
林偉雄為母校忙不停
林偉雄啱啱當選香港中文大學校友評議會主席，睇嚟未來有排忙。佢就話現時每星期都會返去學校一、兩次，仲要代表學校出席一啲活動，例如要專程飛去溫哥華睇一場騷，不過可以為母校做啲嘢，幾忙都開心咁話。
卓妮