都話「政府唔係解決問題嘅方法，政府本身先至係問題所在」，睇吓港府咪知囉，超強颱風山竹離港已經半個幾月，唔止路面塌樹仍然未清理好，偏遠離島嘅災情先至最令人慘不忍睹，如果政府真係急民所急，又點會任由災民自生自滅吖。
嗱，吉澳係其中一個被港府遺棄嘅離島，尋日東網記者登島視察，赫見當地一片狼藉，垃圾山仲堆到比人更高，發出陣陣惡臭，烏蠅亂飛。咁仲唔止，島上唔少平房連屋頂都被吹走，整幅牆倒塌，仲一度斷水斷電添。居民連日來向唔同政府部門求助，結果被當人球咁踢，食環署拖延多日，係就係有派人清理吓垃圾，可惜人手太少，至今只係安排過一次船隻運走垃圾咁大把，話係做戲咁做都冇冤枉。
港府無情，好在人間有愛。唔少義工自發登島幫助居民執垃圾，旅遊業界亦組織過百名導遊及旅行社職員到當地善後，實行自己景點自己救。業界代表話喎，吉澳係生態旅遊勝地，亦係地質公園其中一個景點，但由於位置偏遠，乏人支援，當地長者叫天不應、叫地不靈，所以決定親自動手救救吉澳。冇錯嘞，政府靠得住，豬乸會上樹，等官僚做嘢喎，不如自己落手落腳冇咁嬲。
睇到喇，成日話香港人情紙咁薄，其實一方有難，八方支援，冷漠嘅只係港產官僚咋。唔止吉澳，全港各區都有義工自發幫忙收拾殘局，好似重災區之一嘅杏花邨咁，連廿幾年前嘅快餐店垃圾都沖埋上岸，結果居民及義工齊心協力，話咁快就將社區回復原狀。反觀港府高官除咗自吹自擂防災「暢有成效」，就翹埋雙手乜都唔理。梗係喇，高官出入有專車接送，又有警員鳴鑼開道，根本不知民間疾苦，叫佢哋為高鐵錦上添花就叻，叫佢哋雪中送炭喎，睬你都傻。
話時話，滿目瘡痍嘅點止吉澳，東平洲、蒲台島等偏遠離島、部分新界鄉村、石澳等地同樣災情嚴重。好似屯門楊小坑村一間茶餐廳及圍牆被壓毀，東主四出奔走求助，政府部門個個裝聾扮盲。真係諗極唔明，天災面前，人人不平等，金融中心、半山區呢啲風水寶地早就執到乾乾淨淨，偏遠地區就猶如第三世界，唔通權貴係人，平民百姓就唔係人？港府喺風暴前夕係威係勢跨部門應對，風災過後就冇晒影，有冇再離譜啲吖。
家陣最慘係，港產官僚唔止涼薄無能，仲死要面子。舊年澳門被天鴿重創，當地政府都識得低低哋請解放軍幫忙，偏偏林鄭就連紀律部隊都唔肯出動。有人話，全港最大件嘅垃圾堆晒喺門常開嗰度，真係冇講錯o架。