南韓樣靚身材正兼且具有氣質嘅模特兒有唔少，但係講到外表睇得之餘，運動又得嘅模特兒，必然要數李書賢，佢不但擁有高挑身材，玲瓏浮凸嘅三圍加上出色嘅口才，令佢成為體育模特兒界中嘅女神。
模特兒為咗保持苗條身材，都會有做運動嘅習慣，不過佢哋唔敢操得太勁，擔心會練出一舊舊肌肉，影響外形。不過對於李書賢嚟講，卻一啲都唔擔心呢個問題，皆因佢深明健身要點，知道點樣運動既可以保持身材，同時又唔會令自己變成肌肉女。喺未入行前，書賢已經係一位外形迷人嘅索女，前凸後趷嘅魔鬼身材加上標準模特兒嘅身高，令人以為佢會朝住演藝界發展，但係佢竟然走咗去修讀運動及健康飲食學位，原來佢希望能夠喺運動界大展拳腳。
後來佢被模特兒事務所嘅星探睇中，邀請佢加入模特兒界，起初佢決定唔到，於是走去問曾經做過模特兒嘅朋友，喺對方嘅解釋下，佢決定畀自己一個機會，睇吓自己能夠做到乜嘢成績出嚟。佢坦言並未諗過會做幾耐，只係希望能夠擴闊視野，另一方面係因為佢自覺並非一個坐定定工作嘅人，而模特兒工作正好符合佢好動嘅性格。初出道時，佢以攝影模特兒身份拍攝一系列泳衣寫真，擁有激凸上圍嘅佢，喺性感泳衣之下充分展現出玲瓏浮凸嘅曲線，如此誘人嘅天賦本錢，加上健美嘅外形，即時獲得大家嘅注目。有見及此，事務所便接連安排各種同運動有關嘅攝影工作，從而奠定佢體育模特兒嘅形象。
李書賢除咗勤做運動，對於運動理論，尤其係喺健身方面亦深有研究，因此經過幾次大型體育產品展銷活動後，有唔少體育品牌主動搵佢做產品代言人，就係咁，佢慢慢被廣告商留意，模特兒事業發展更係一日千里。除此之外，佢亦以健身達人身份喺網上教女士點樣健身，令體形變得更健美。不過講到佢事業嘅轉捩點，卻要數喺2012年時接到電視台一個工作邀請，就係以健身達人嘅身份喺節目上教授女士健身技巧，其中一集係做運動令胸部升Cup，更係獲得極大嘅回響，同時令人氣推上高峰。
雖然李書賢喺健身界嘅人氣極高，但係佢深明自己最重視嘅工作仍然係模特兒，為咗唔想局限做體育模特兒，近年接下同體育主題冇關嘅工作，同時作唔同嘅打扮令自己睇起嚟多啲女人味，希望改變形象令發展空間更大，結果成功令模特兒事業更上一層樓。喺李書賢嘅身上唔難發現，想成為一位人氣模特兒唔單止要有外形，仲要有頭腦先至得。
出生地：首爾
身 高：172cm
三 圍：35-24-35
撰文：魂