財政司司長陳茂波日前偕同紀律部隊義工清除塌樹，做騷意味濃得化不開，假到出汁，但他自嘲「手腳慢」，卻是罕見的真心話，而且不止代表其個人立場，更高度概括了整個特區政府的風災善後工作表現。
超強颱風山竹離港逾半個月，不少地方仍是一片狼藉，街道上布滿殘枝斷木，至今仍未清理，結果要市民自發幫手搬樹。市民發揮守望相助精神，固然值得點讚，但高官們一個二個年袋幾百萬元人工，卻沒有做好自己份工，搞到市民要自力救濟，落手落腳搬樹做騷大家心領了，高官帶頭「罰俸」幾個月，市民的氣還可以消一消。
山竹襲港沒有造成重大傷亡，也算是老天爺對港人的厚愛，可是特區官僚卻貪天之功以為己力，左一句救災工作「暢有成效」，右一句「救災工作做得好」，到底知唔知「醜」字點寫？政府善後工作表現如何，不是官老爺說了算，而應該問問東平洲、蒲台島及東龍洲的店主和住戶。屯門一間茶餐廳東主的意見，亦值得港產廢官參考，該店圍牆被大風吹塌，東主求助多個政府部門要求協助清理，卻被當人球咁踢，直到茶餐廳傳出異味，恐有人被困，才請得動消防老爺上門搜救，如果該店東也認同當局救災工作「暢有成效」，則「呢個係事實，咁就惟有係事實」。
古人說，多算勝，少算不勝，況乎無算乎？全球暖化，氣候異常，類似山竹的颱風未來恐怕陸續有來，特衰政府今次風災前成立所謂跨部門應變小組，由保安局局長領銜，一字排開見記者，一派嚴陣以待的架勢，事後證明姿勢大於實際，負責官員連日潛水唔見影，「統籌」云乎哉。咪話唔警告，政府繼續掉以輕心，以冇死人為「最佳估算」，等到爆出大鑊，悔之晚矣！