政情：沙田區會訪馬國 45秒批款兩人出團

今屆區議會開始，政府資助每名區議員一萬港元外訪撥款，而唔少區議會已陸續出發到各地訪問，次數仲頻密過立法會議員。沙田區議會上月底召開會議，審批嚟緊月中去馬來西亞外訪團嘅撥款，議程喺零反對下，在四十五秒內火速獲得通過。不過成團人連埋團長都係得兩個人，可能係全港最少人嘅外訪團。

根據區議會文件，沙田區係「健康城市聯盟西太平洋區」成員，兼且被選為聯盟指導委員會主席，嚟緊月中聯盟召開全球會議，作為區議會衞生及環境委員會健康城市及國際復康日工作小組召集人嘅龐愛蘭（Scarlett），就要去到當地主持會議同出席研討會等，而另一名區議員余倩雯都會一齊去。

Scarlett笑言「鬼叫我哋選中做主席咩」，係職責所在先要去，而過去十幾年都係自費去，粗略估計使咗超過十萬元，咁政府依家有資助就試吓組團一齊去。佢仲話，全港十八區中，有十五區都係聯盟委員，所以已經將計劃書轉發各區參考。