政情：唔幫病人吊鹽水 盧寵茂呻港大深圳醫院不受歡迎
本身係香港大學醫學院教授嘅盧寵茂兩年前接任港大深圳醫院院長一職。佢尋日出席一個有關跨境安老嘅圓桌會議時爆料，話最初醫院喺內地唔受病人歡迎，甚至內地人覺得佢哋醫院唔係一間好醫院咁話。究竟點解該院會被列為不受歡迎醫院呢？
盧話內地醫院盛行幫病人打「點滴」，即俗稱「吊鹽水」嘅靜脈注射，但因為港大深圳醫院係用香港管理模式，而香港醫生基於容易產生副作用同抗藥性，係唔會輕易幫人打「點滴」，所以該院門診都唔會幫病人打「點滴」，結果習慣內地醫療方式嘅內地病人就覺得該院唔係好醫院，因而去佢哋醫院求醫嘅病人仲好少添！好彩該院實行醫療服務收費「封頂」，比起內地其他醫院，病人更易估算醫療使費，佢哋先至多番啲病人，可以自負盈虧。
香港醫療券可以喺該院使用，但只限門診，佢話搞到喺該院求醫嘅香港人如要做手術、住院都要返港求醫，希望政府可擴展醫療券服務範圍。唔知同佢同場嘅行政會議成員林正財會唔會幫盧向政府反映意見呢？
講開先知，原來林同盧係同學仔，當年一齊喺港大醫學院讀書，難得一齊出席活動，佢哋都話要影番張相發去WhatsApp群組畀書友睇。問到兩人讀書時有冇一齊走堂唔返學，林就話自己就經常走堂，但盧就好少，仲笑稱︰「佢走堂點做到教授呀？」