政情：謀包攬人事編制正副主席位 建制鼎走楊岳橋

人事編制小組委員會過去兩年都係由議員葉劉淑儀做主席，AY做副主席，泛民同建制派一人一個位唔使爭。不過，有建制派透露，葉劉淑儀講過長遠唔再做呢個位，迫令建制派有需要搵定接班人，而今個立法年度要再選過正副主席，就係最佳機會培訓定接班人，所以今次就要攬晒正副主席囉。

未雨綢繆 做副主席當訓練

其實人事編制小組所面對嘅情況並非單一例子，好似財務委員會（財會）都一樣，因為未知做咗幾年財會主席嘅陳健波會否連任，所以盛傳今年都會換上議員陳振英做副主席，未雨綢繆為將來作預備，以副主席一職當訓練。

建制派副班長陳克勤接受查詢時就表明唔評論個別委員會嘅人選，但就透露建制派已經喺尋日會面，就各委員會主席人選安排有初步諗法，不過仲要等各政黨內部作討論。佢更話，今年嘅正副主席比例同往年接近一樣，強調建制派無再攞多啲席位，而以往讓泛民做開正副主席嘅事務委員會，好似福利同衞生事務委員會，就會繼續維持呢個做法。不過，早前就有指建制派封殺民主黨（白鴿黨）尹兆堅同鄺俊宇，其中鄺俊宇上個立法年度出任福利事務委員會副主席，唔知陳克勤咁講，係咪代表唔會封殺鄺俊宇呢？

AY有意掌工商事務委員會

另外，以往泛民曾經玩過突襲，所以建制派自此都會「冧友」務求掌握主導權，但往往選完正副主席後，就會出現退會潮。而建制派今年繼續採用「11+2」做法，即加入晒財會轄下嘅人事編制小組同工務小組後，再加入十一個事務委員會，所以就算建制同泛民就事務委員會主席人選講唔掂數，泛民都難以玩得出花樣喇！

至於泛民方面都已經傾咗，同樣需要等待唔同板塊內部決定，但爭議不大，目前有意角逐司法及法律事務委員會主席，但估計建制派唔會放行，至於被建制派逼走冇得做人事編制小組副主席嘅AY，就有意接過工商事務委員會嘅主席位置，但坐正定做副主席，就要視乎建制派咁話。