中環出更：立會育嬰室使用率低？容海恩嘆梁君彥唔了解女性
首位任內懷孕嘅立法會議員容海恩（Eunice），為BB出世做好準備，早排去信立法會主席梁君彥提出多項要求，包括增設母乳餵哺室等。梁已喺前日回信畀Eunice，話根據秘書處資料，依家立法會嘅幼兒護理室同母乳餵哺室使用率唔高，議員可以喺自己議辦湊BB或餵哺母乳喎。
至於遙距投票，梁君彥就話議員唔係職業，係服務市民，而根據《基本法》議員要出席會議先可以投票，所以如果引入遠程科技投票或者同法例有牴觸，但點都好佢都會應要求將意見交畀行管會同議事規則委員會討論吓。
話主席「為回覆而回覆」
Eunice睇見封回信就慨嘆，主席係「為回覆而回覆」，秘書處資料都話立法會內好多人有BB，而且增加護理室和母乳餵哺室都可以畀公眾使用，直言可能主席唔多了解女性需求喇，長遠而言增加設施唔只係為咗佢個BB，係所有女性嘅權利。佢又話，明白改投票規矩係難，但起碼大家可以討論吓先。
卓妮