中環出更：余鵬春旋風式遊金門 難忘鮮涮牛肉麵
曾經屬於敏感戰地嘅台灣金門近年成為旅遊熱點，識玩嘅人都知，金門接近福建廈門，經廈門搭船去反而比由台灣搭飛機去更方便。香港總商會一班成員早前去廈門公幹之後，就搭船去金門玩，即日來回。總商會理事兼台灣小組主席余鵬春（PC）都係團友之一，佢係第一次去金門，盛讚當地美食多、風景靚，尤其係特有嘅鮮涮牛肉麵，迷倒一眾團友添！
PC話當日佢哋早上九點幾由廈門出發，坐半個鐘船就到咗金門，即日下午五點返廈門，可以話係「旋風式」訪問。此行最印象深刻嘅係品嘗金門必食嘅牛肉麵，呢碗麵除咗好味之外，背後仲有環保理念，所以食落特別鮮甜。
榮明珠趁機飲多兩杯酒
事關金門高粱酒一向聞名，但大量嘅酒糟產生環境污染問題，於是牧場就以酒糟餵養黃牛，肉質特別好味。鮮涮牛肉麵係用熱辣辣嘅高湯，喺食客面前直接淋落鋪滿生牛肉及麵嘅湯碗內，夠晒新鮮，PC即舉起手機錄影，仲廣傳同好友分享。
今次訪問係應當地立法委員楊鎮浯邀請，事關對方喺今年四月曾經到訪總商會，呢趟屬禮貌性回訪，團友仲有總商會工業及科技委員會主席黎元輝、卓妍社副主席榮明珠等人。咁啱榮明珠係做酒品貿易，對酒好有研究，特別鍾意中國嘅白酒，所以食飯時梗要趁機飲多兩杯啦！
此行團友亦睇到唔少商機。有人睇好當地休閒旅遊嘅潛質，研究緊去投資供長者安享退休生活嘅度假村。PC笑笑口話，總之個個都覺得意猶未盡，話下次要再去過，如果香港有直航機去金門就好啦！
卓妮