政情：湯恩佳健康秘訣：日日游水
早前我哋見到香港孔教學院院長湯恩佳同太太、細仔一家三口喺中環行街街，湯恩佳同太太手拖手，阿仔就幫手拎嘢，三人有講有笑，非常溫馨。之後佢哋入咗一間醫務所，逗留咗成四十幾分鐘先走，原來係湯恩佳去做身體檢查啫。
忙到冇時間催女兒「造人」
湯笑稱自己身體無咩事，仲分享保持健康嘅秘訣，就係日日游水，每朝起身後喺自家大宅游半個鐘水，唔怪得佢日日趕場出席活動，都咁好精神喇！佢又話，每日要處理全球孔教嘅事務，忙到連休息時間都無，所以都冇催年頭出嫁嘅女兒造人，驚到時要煩惱點樣抽時間去探孫喎！
至於喺鑽石山大磡村興建香港首間孔聖廟嘅計劃，早前因為補地價問題而受阻，不過湯恩佳就透露問題已解決，現已入紙向政府申請動工。唔知結果係政府減價，抑或湯恩佳搵到「大水喉」呢？