中環出更：網民「回帶」十一港鐵優惠 何啟明中招
網上資訊多，近年不時出現「回帶」，瘋傳舊有資訊誤導網民。工聯會立法會議員何啟明呢兩日就成為受害者，尋日佢喺Facebook上指，有網民近日廣傳一張由佢辦事處發出，關於十一港鐵乘車優惠嘅海報，但其實係去年嘅事，難怪佢貼出大大隻字，叫大家「唔好傳錯呀」！
去年十一假期連放兩日，港鐵趁機推出嘅乘車優惠，唔少政黨亦有派發傳單告知市民。不過今年就冇呢啲着數，所以何啟明除了呼籲網民不要再傳，亦提醒市民今年港鐵沒有提供優惠。但係佢喺貼文中都建議港鐵可以考慮重推優惠，之不過今日已經係十月一日，依家先出聲，都係做吓樣嘅啫。
舊海報無印年份惹誤會
唔少網民留言發表心聲，有人希望港鐵唔好年年加價，亦有人希望可以每年都推出優惠。不過亦有眼尖網民提醒何啟明，指佢喺舊海報上只印上優惠日子，冇年份，梗係會誤導喇，建議何啟明在出海報時，寫齊年、月、日，咁市民咪唔會被誤導囉！
卓妮