中環出更：速食文化盛行丘璟珊倡慢食新態度
隨着時代改變，好多女士都未必識煮餸。網絡烹飪儷人朱嘉盈（Norma）早前應金紫荊女企業家協會（協會）邀請出席午餐講座，同一眾姊妹分享佢嘅下廚同創業經驗時，笑稱自己原本從事金融業，後來發覺身邊好多女仔覺得煮嘢好老土，於是佢就將簡易烹飪心得拍片放上網公諸同好，估唔到成就咗一盤有創意嘅生意，後來仲索性轉行添！
Norma現時大多數時間喺上海，同家人聚少離多，難得返港同老公撐枱腳，就會炮製對方最喜歡嘅麻婆豆腐。雖然話時下女性唔識煮嘢，但係咁啱現場幾位女士都有啲煮嘢天分，好似協會主席丘璟珊就遺傳媽媽嘅烹飪細胞。佢仲身兼香港慢食協會主席，笑稱目的唔係單純抗衡快餐文化，而係提倡就地取材及以傳統方式烹調，以喚起大眾惜食嘅生活新態度。
歐陽鳳盈家政全級第一
出席午餐會嘅仲有協會常務副主席李凱琪、執行委員沈貝嘉、主辦機構之一嘅香港島婦女聯會副主席陳巧莉及副秘書長歐陽鳳盈等人。歐陽鳳盈都係有烹飪天分嘅新女性，讀中學時就攞過家政全級第一名，不過佢慨嘆依家中學生要應付舞蹈或音樂等興趣班，投入家政嘅時間少咗，自然會影響佢哋日後對煮嘢嘅興趣。
放棄高薪嘅金融業而投入自己興趣嘅仲有沈貝嘉，佢覺得香港人愈嚟愈唔識欣賞漢語，所以幾年前索性辭去金融工作，開班教小朋友漢語，早前仲帶團去台灣交流添！
卓妮