風災過後成個星期，到處塌樹、垃圾圍城問題仍未解決，市民無奈又如何？拿特首出出氣日子就過得容易嗎？「人視水見形，視民知治不。」從水中可以看到自己的形象，從老百姓的精神面貌可以知道一個社會、國家的治理狀況，要言之，就是以民情為鏡。
然而，特衰政府誇誇其談如何「防災一流」，是以「安然度過」，可是災後市面一片狼藉，滿目瘡痍，高官竟然多數「潛水」，像運房局局長陳帆，未曾見過佢為災後市民返工的狼狽講過一聲「對唔住」；發展局局長黃偉綸亦沒有出嚟講吓今次風災點解會大量冧樹，也沒有檢討政府是否連市區種乜樹都唔識，至於之後如何規劃，當然噏吓都嫌費事！
今次颱風山竹襲港，滿街冧樹和垃圾，清潔工人做到氣咳，西貢區有食肆老闆娘專誠為在該區清潔嘅工人煮咗百多個海南雞飯，表達一點心意，免費供給辛勞清潔嘅嬸嬸、叔伯；智商特高嘅勞福局局長羅致光，為何不可以率領員工到各區派吓水慰問呢？何以民間有情，勞福局冇義？「但願蒼生俱飽暖，不辭辛苦出山林」。民生福利，不是抽象空洞的統計數字，局長，多抽點時間落吓區吧，即使做騷都好過乜都唔做！
講吓講吓，老朽忽然覺得頭㷫㷫，睇怕又係血壓上升。係嘞，仲有嗰位至叻家中慳電嘅環境局局長黃錦星，阿星搞環保，至叻就係向市民徵費，搞咗咁多年，香港空氣質素一樣唔掂，老朽只能透過環保署嘅宣傳片見到藍天白雲，其餘時間日日在市區吸塵！呢，山竹過後，政府喺鯉魚門庇護中心嘅物資，包括被鋪及床墊，被指用完一次就丟棄，網民鬧爆政府帶頭做大嘥鬼，仲嫌出面未夠多廢物嗎？
特衰政府各自為政，真正需要協調嘅就各自大耍太極，至緊要咪阻住準時放工。各高官有冇hea做，大家心照啦！