政情：一肥一瘦尹兆堅兩兄弟樣唔似
香港公務員工會聯合會第一副主席尹兆泰，同花名「肥尹」嘅立法會議員尹兆堅個名只差一個字，但因身形同外貌唔似，最多都只會以為佢哋咁啱個名相似。不過世上就冇咁多巧合嘅，佢同肥尹的確係兩兄弟。
尹兆泰話，以前同同事喺街上見到肥尹嘅橫額，同事都會口痕問吓佢哋個名咁似，係咪兩兄弟。不過當佢講出事實話係時，對方就會以為佢講笑。講真齋睇兩人個樣，都的確係好難聯想到佢哋係兩兄弟。
尹兆泰細肥尹一歲半，喺四兄妹中排第二。佢就話，同哥哥肥尹身形有咁大分別，係因為佢會做運動，而性格上就哥哥比較健談。佢仲爆料稱，媽媽話佢膚色較黑，唔似哥哥，係因為當年佗住佢時成日飲咖啡喎。
相處時好少講工作
佢哋兩兄弟目前喺工作上未曾合作過，相處時亦都好少講工作，尹兆泰話怕合作會令到議題焦點糢糊，變咗落喺兄弟關係上，不過如果工會其他成員覺得合作有利，佢都唔介意同哥哥拍住上咁話。