政情：囝囝有心事 搞到陳學鋒眼濕濕

周記上畫爸爸同自己嘅公仔

陳學鋒話，佢太太之前幫就讀小學三年班嘅囝囝檢查功課，發現囝囝喺周記度寫自己有心事，原因係爸爸日日都好夜先至返屋企，搞到有事想同爸爸講都唔得，好想爸爸可以早一啲返屋企咁話，佢囝囝仲喺周記上畫埋爸爸同自己嘅公仔添。

陳承認平時收工返到屋企，囝囝已經瞓咗覺，朝早囝囝返學時，就係佢落區嘅時間，所以都好難送到囝囝返學，雖然每逢周六同周日都想盡量陪多啲囝囝，但係周末同大時大節係落區「黃金時間」，所以都冇計，好彩太太同佢相識時，已經知佢做社區工作，所以都冇詐型。

陳又話，太太睇到囝囝嘅心事之後，都有提醒佢要多啲陪吓囝囝，佢以後會盡量多啲陪囝囝，同囝囝一齊上跆拳道班咁話。