政情:今日你上鏡:唔做官唔留鬚 陳岳鵬青靚白淨

政制及內地事務局前副局長陳岳鵬(Ronald,右一)喺官場時以「留鬚Look」老成造型示人,以免被人覺得太後生唔穩重,去年五月佢辭官去美國哈佛大學進修,學成回港嘅佢就剃咗鬚,果然「無官一身輕」,瞬間回復青靚白淨。

又名大館嘅中區警署建築群活化後開放,中華出入口商會副會長許華傑(Michael,左一)話,今年初喺大館對面位置租咗辦公室,日日見住大館裝修,都想去參觀,於是佢就同Ronald及幾位後生仔女去參觀。咁唔通Michael想乘機招攬學成歸來嘅Ronald?Michael就話,Ronald任南區區議員時佢哋已認識,因為啱傾,一直保持聯絡,今次只係趁大館重開,相約一齊參觀,純粹同埋班後生仔傾吓偈咁話喎。

第一手消息請下載on.cc東網iPhone/iPad/Android/Windows Phone Apps