政情：教育事務委員會 蔣麗芸傳續坐正 葉建源恐又做老二

據了解，建制派同民主派仍然未就嚟緊呢一個年度十八個事務委員會正、副主席事宜正式商討。不過，消息指建制派一方已計劃部分事務委員會要繼續由建制派掌舵，其中之一就係教育事務委員會。而佢哋揸住唔放嘅原因就係近年港獨思潮入侵校園，令點樣喺校園掃「獨」成為教育新議題，擔心委員會主席之位交畀葉建源會出事。加上Ann曾經表明想繼續擔任委員會主席，故此建制陣營亦都傾向支持Ann繼續「坐正」。

初時商討建制泛民輪流擔任

由同一位議員做足四年教育事務委員會主席亦並非新鮮事，前立法會議員林大輝喺上一屆立法會就做足四年該委員會主席，而副主席就全由葉建源擔任。對於或會再次屈居副主席做「萬年老二」，葉就話，建制派同民主派當初商討時已有正、副主席輪任嘅共識，強調新一個年度應該按慣例換人。

不過Ann就唔係咁睇喇。雖然佢一方面否認想霸住主席一職，但另一方面又話正、副主席之位唔應該輪任，而係要再選舉多一次。佢仲話，自己雖然唔係教育界中人，但正因為咁，先可以更公平、公正咁處理業界問題喎。聽落葉要坐正都危危乎喇。

立法會傾國歌法 建制唔讓路

另外，立法會司法及法律事務委員會主席亦都將係建制派必爭之位。事關十月復會之後，該委員會將要處理極具爭議嘅《國歌法》立法工作，對於主責嘅律政司司長鄭若驊，建制派就有人質疑佢嘅能力，認為佢過去表現甩甩漏漏，擔心唔穩陣，為咗避免「甩轆」、變相送分畀民主派陣營，建制派已經決定唔會畀現任嘅委員會副主席、法律界立法會議員郭榮鏗「揸莊」，主席之位將會由現任委員會主席梁美芬續任。

雖然話委員會正、副主席係選舉產生，但喺立法會建制派佔多數下，建制派只要「冧友」搶位，主席之位自然係佢哋囊中物。不過會唔會引嚟民主派強烈反彈，建制派都真係要諗過度過喇。