中環出更：山竹期間「冇影」 陳帆現身解畫
山竹襲港令香港交通大癱瘓，主責交通嘅運輸及房屋局局長陳帆被指「失蹤」多日，冇親自對外交代全港交通運輸嘅最新情況，直至尋日，即山竹襲港掛十號風球後近一周，陳帆首度開腔就「失蹤」解畫，佢對於呢段時間點解冇現身輕描淡寫，聲言整個政府團隊由預警到懸掛風球都係夙夜不眠，真係信不信由你嘞！
話自己同其他部門緊密聯絡
陳帆尋日會見傳媒，被問及山竹襲港期間冇影一事，佢首先話，整個政府團隊由預警到懸掛風球都係夙夜不眠，自己同政府高官及其他政府部門緊密聯絡，之後爆料稱運輸署署長及路政署署長，呢段時間每晚都係瞓兩、三個鐘，至於佢自己呢段時間每晚瞓幾多個鐘，佢就冇對外透露嘞！
其實陳帆身為問責高官、每月人工三十多萬元，於山竹襲港前後親自向公眾做好解說工作，係應有之義，絕對冇理由將呢個站在第一線嘅責任，交畀運輸署署長，究竟呢個安排係怕陳帆「唔熟書」，驚風災後現身被問到口啞啞，定係另有考慮，相信一眾議員會繼續窮追不捨，直至真相大白為止。
卓妮