中環出更：倫敦金嚇怕人李俊亨畀貼士保平安
買賣倫敦金嘅騙案屢禁不止，令市民一聽到「倫敦金」三個字就聯想到騙局，認真大件事。早前香港貴金屬同業協會會長李文偉（Gary）旗下嘅金融集團舉行擴充喬遷開張儀式，卓妮同多位名人傾開呢個話題，個個都戥「倫敦金」唔抵。Gary兒子李俊亨（Henry）仲畀咗好多「保平安」貼士，話最緊要唔好簽署授權書，買賣自己話晒事，咁就唔會上當喇。
Henry話，「倫敦金」係指喺倫敦發生嘅黃金交易，本身冇問題，但係香港不法分子利用不正當嘅手段，氹投資者授權佢哋買賣，經紀為咗賺佣金，於是頻頻買賣，唔理賺定蝕。佢聽過有人一日之間可以買賣幾百次，十分誇張。所以佢就建議投資者唔好簽買賣授權書，話其實黃金同股票一樣，自己買賣都得。
羅少雄：買賣唔可以授權
國際專業保險諮詢協會會長羅少雄都有投資倫敦金，而且多年來都係自己買賣。佢話買賣梗係唔可以授權畀人，否則就好似打開屋企門口畀人任攞財物。Gary就話，投資者最緊要幫襯信譽良好、有香港金銀業貿易場牌照嘅行員，仲要不時注意戶口郁動，咁就多幾重保障喇。
當日到賀嘅仲有香港金銀業貿易場理事長張德熙、國際獅子會前國際理事文錦歡、香港左軚汽車商會副會長戴天為等。Gary太太、香港壽臣山獅子會創會會長嚴偉貞就忙於招呼賓客。主人家特地懇辭花籃，請好友將心意化為慈善捐助，為泓福慈善基金及香港壽臣山獅子會籌募善款，十分有愛心。
卓妮