政情：外遊期間牙痛 鄭文聰忍返港求醫
話說香港工業總會名譽會長鄭文聰早前去立陶宛玩，亦已經講過喺當地蕩失路，原來喺旅程尾段更受牙痛問題困擾，忍到返香港即刻求醫，真係一波三折喇！
笑自己牙尖嘴利
鄭文聰今次外遊期間牙裂，唔好以為佢係食得太多美食所致，而係天生牙尖嘴利喎。佢解釋，因為自己牙太尖，上下牙多年來都有碰撞，久而久之咪導致有裂縫囉！而回程十幾個鐘頭中，不斷要靠含住凍水減輕痛楚，所以成程機佢一共飲咗十幾支水咁多，真係冇覺好瞓。
不過，今次已經唔係佢第一次外遊期間牙痛，事關多年前去泰國時都試過，要喺當地搵華人牙醫處方止痛藥應急。而佢都自言好怕睇牙醫，如果睇牙時有人畀佢捉住，一定會搞到對方瘀晒添，認真估佢唔到喇！