政情：報錯西九站爆玻璃 鄭松泰認衰道歉
「山竹」襲港造成巨大破壞，立法會議員鄭松泰前晚喺Facebook（Fb）貼圖同貼文，指收到市民報料話高鐵西九龍站「天空走廊」爆玻璃，但原來可能係因倒影造成錯覺，佢尋日喺Fb貼出澄清啟事，為報錯料認錯兼道歉。
佢喺Fb話前晚佢嘅辦事處收到市民報料，指西九龍站天空走廊喺山竹吹襲下爆玻璃窗，辦事處確認照片係喺星期一（即山竹過後翌日）拍攝後，公開發布照片並要求港鐵同政府回應。事後港鐵回應傳媒查詢，指「沒有爆玻璃，完好無缺」。
照片倒影造成錯覺
辦事處尋日派員實地了解，雖然只能遠距離觀察，但玻璃窗確實冇爆破。報料市民亦再去同一位置拍攝，相片嘅倒影略有不同，估計係因為倒影造成嘅錯覺，就此，佢嘅辦事處特地澄清，並就造成資訊混亂同有關爭議致歉。
雖然鄭松泰就事件致歉，但係有港鐵中人批評，鄭作為立法會議員，唔可以生安白造，尤其有港鐵高層喺十號風球期間在場監察，西九龍站絕冇爆玻璃。
