政情：山竹癱瘓交通 連日玩失蹤 陳帆蒲頭零交代
超強颱風山竹襲港，將港府處理風災善後工作嘅進退失據表露無遺，尤其係港府堅持「停課不停工」嘅決定，大批打工仔狠批港府高官「堅離地」，根本唔知道交通大癱瘓返唔到工有幾大鑊，港府高官連日現身撲火，但最令人意外嘅係，月薪三十多萬元嘅運輸及房屋局局長陳帆，竟然連日失蹤無影，直至尋日中午，陳帆終於首度露面，之不過有關活動同山竹襲港善後無關，亦無趁機就近期交通甩轆解畫。其實陳帆身為問責局長，若然連交通大癱瘓呢啲重要時刻都唔現身穩定人心，真係點講都講唔過去囉！
上周中陸續有消息傳出，山竹或會直撲香港，當時港府都嚴陣以待，先後於上周三及上周五舉行跨部門會議，有關會議由保安局局長李家超主持，及至山竹周末襲港，香港全城停頓，海陸空交通大癱瘓，政府於本周一展開善後工作，但一開波就落筆打三更，大批打工仔喺港鐵東鐵段未完全開通，及多間巴士公司有限度提供服務下要返工，自不然怨聲載道，怨氣沖天。
就此，運輸署署長陳美寶先後兩次現身交代最新交通及路面情況，相反，主責運輸交通政策嘅陳帆失去蹤影，無主動見傳媒就交通大混亂「拆彈」，翻查資料更顯示陳帆上一次露面已經係上周三，當日低調視察高鐵西九站已被斥做法鬼祟。
雖然運房局對外宣稱，陳帆一直參與應對山竹襲港嘅會議及工作，政界對於陳帆失蹤嘖嘖稱奇，立法會議員區諾軒喺Facebook二次創作電影海報，揶揄陳帆係「消失的局長」，需要「全城尋帆」，另外一批網民更稱要「拋西瓜」去尋找陳帆，希望對方唔好再潛水。
陪同深圳市委書記視察西九站
言猶在耳，陳帆尋日中午終於喺香港現身，之不過咪以為佢終於諗通咗，要為山竹襲港期間嘅交通甩漏解畫或力撐下屬已經竭盡所能解決問題，其實陳帆今次現身係做「陪客」，陪同深圳市委書記王偉中視察高鐵西九龍總站，加上今次視察事前未有通知傳媒，陳帆離開時冇解釋點解山竹襲港期間未曾露面，傳媒亦冇機會直接問個究竟。
事實上，山竹襲港係問責高官展現政治能量嘅重要時刻，陳帆竟然「神龍見首不見尾」，要由公務員下屬去應付呢個困難時刻，究竟陳帆有多少政治承擔，答案已經係寫在牆上。