堆填區垃圾流汁 環保署懶到出汁

元朗區議會尋日開會討論新界西堆填區流出垃圾汁嘅問題，環保署又係例牌打官腔敷衍交差，聲稱已經知悉堆填區其中一個雨水收集裝置開關掣冇關妥，有污水經大水坑流出咗河流支流，又話會喺有足夠證據嗰陣就會檢控承辦商，至於點解至今未收集足夠檢控證據、有咩善後措施等，一問三不知，爭在未好似佢哋老頂咁，叫居民同條臭河「互諒互讓」，真係唔到你唔服。

嗱，堆填區有幾厭惡唔使多講，垃圾汁除咗臭，仲帶嚟嚴重污染問題，唔單止本地居民不勝其擾，連住喺堆填區對面嘅深圳人都抗議。環境局當初向市民落足嘴頭，話會用盡方法將堆填區對環境嘅污染減到最低，結果過咗海就係神仙，冇錯，承辦商冇閂好開關掣，垃圾汁四溢搞到附近魚塘水產反晒肚，的確難辭其咎，但如果唔係環保署冇監冇管，又點會搞成今日咁。

堆填區好天曬落雨淋，今次颱風「山竹」過後，又唔知有幾多垃圾嘅污染物被雨水沖走。不可不知，呢啲垃圾汁含有阿摩尼亞成分，最近一次就錄得超標達九千五百倍，你話唔驚就假。最離譜嘅係，環保署早喺八月就知道出事，但係都要等到傳媒踢爆至死死地氣承認，臭屎密冚都算嘞，仲要拖到依家都未有解決方案。成日話港產官僚唔死人冧樓唔做嘢，環保署咪就係最佳人辦囉。

話時話，涉事承辦商舊年已經違反《水污染管制條例》及合約條款，被罰近八百萬港元，由佢哋負責嘅屯門望后石谷堆填區修復工程，更加試過連續幾個月無法處理污水，要運去政府設施處理。有議員形容有關公司前科纍纍仍然生意滔滔，堪稱「廢物處理界嘅禮頓」，一啲都冇誇張。難為環保官僚仲好意思幫手開脫，話每半年寫評核報告會影響承辦商喺政府項目嘅中標機會。講真，相對數以十億元計嘅政府合約，區區幾百萬元罰款根本冇阻嚇力，承辦商但凡投到合約就等同求到一道幾十年嘅護身符，小小罰款就當係成本咯！

港府批出合約後拍拍屁股，放任自流，承辦商違規幾近零成本，唔Hea做至怪。所以話，垃圾汁問題都係由垃圾官員一手造成，垃圾汁臭到作嘔，廢官僚懶到出汁，惡頂程度可以話係半斤八両。