微軟創辦人蓋茨講過：「我喜歡找懶人去做艱難工作，因為懶人會想出最簡單的方法。」即係話，人懶啲唔緊要，最緊要係叻。可惜吖，港產官僚唔止懶，仲要蠢，而且係蠢到冇朋友嗰隻，好似滅蚊咁吖，竟然仲用緊咸豐年嘅古老招數，香港爆發本地登革熱有乜出奇吖。
呢，登革熱自上月爆發以來，短短十幾日，確診個案達到二十九宗，破咗二○○二年嘅紀錄，疫情嚴重大家有眼見。港府事後急急補飛，封咗感染源頭獅子山公園，又喺另一重災區長洲加強滅蚊。食物及衞生局局長陳肇始尋日去大圍做滅蚊騷，對於過去一星期未有新增本地登革熱個案，佢即刻認叻話情況已經受控喎，即管睇多兩日再講啦，千祈唔好又自打嘴巴呀！
點解咁講？事關港府最拿手粉飾太平，弄虛作假已經係指定動作，本報記者發現當局唔止滅蚊手法落後，唔少滅蚊裝置仲要「裝假狗」，難怪有專家話疫情根本未見頂呀。所以話啫，「港官靠得住，豬乸都會上樹」o架。
講真，科技發展一日千里，滅蚊技術都係日新又新。大家有眼睇，世界各地唔少地方都用緊先進方法嚟滅蚊，既有喺基因上面着手，減低雄蚊嘅生育能力；亦有以積水防蚊薄膜，控制孑孓數量，杜絕蚊患；更加有利用紫外光燈加藥餌嚟誘蚊滅蚊等，唔止成效顯著，對大自然環境傷害亦低，係好使好用嘅滅蚊法寶。相比之下，港府官僚只係得把口擁抱創新科技，一副頭腦始終係徹頭徹尾嘅老古董，今時今日滅蚊仍然用緊三十年前套古法，主要靠噴灑蚊油同滅蚊噴霧，你話死唔死吖。
喂，香港成日落雨，雨水會稀釋蚊油，噴完等於冇噴。最可怕係，滅蚊噴霧嘅殘留藥液，小朋友唔小心接觸到呢啲化學劑，有機會引發皮膚過敏，狗隻更加會出現嘔或者抽筋情況。港府滅蚊唔成，仲要靠害市民及寵物，係咪離譜先？
講起港府滅蚊手法落後，真係笑話一籮籮。咪睇當局喺康文署場地裝滅蚊機，又喺公共屋邨裝石油氣誘捕蚊機，但其實裝假狗咋，唔少機器根本冇開動過，淪為得物無所用嘅裝飾品。最搞笑係，燃料用晒唔換，喺誘捕蚊機外殼貼上防蟲貼嚟吸蚊，簡直自欺欺人。更加唔使提食環署防治蟲鼠組充斥蛇王，一日最多做三粒鐘，搞到防治蟲鼠組變成縱容蟲鼠組，問你點頂！
都話喇，港府最叻胡混度日，大事唔識做，小事做唔好，連自然界嘅蚊患都滅唔到，更加唔使望有效打擊港獨、反中亂港漢奸走狗同南亞兵團等一干「人形」蛇蟲鼠蟻呀。