西九文化區管理局同M+博物館嘅總承建商終止合約事件，多名議員尋日喺立法會相關事務委員會上鬧爆管理局處理事件透明度不足，又話喺舊年十二月同今年一月嘅立法會財務委員會上，曾詢問西九管理局行政總裁栢志高關於承建商嘅財政狀況，但佢只交代工人嘅支薪，並冇提及承建商陷入財困，亦無披露西九管理局已成立附屬公司處理事宜，質疑栢志高欺騙、隱瞞、誤導立法會，但栢志高否認指控，仲話工人有準時受薪，話邊個支付薪酬係另一問題添！老實講，栢志高擺明係出口術，想甩身喇！
