政情：港電競隊奪金冇人知 陳龍盛批乏宣傳
政府話推動電競，但支持力度就睇落唔多足夠。香港電競總會副主席陳龍盛話因欠缺推廣平台，依家多數港人仍然搞唔清楚電競同打機嘅分別，就連香港電競代表喺亞運連場鏖戰亦乏人知曉，以致凱旋報捷亦恍如錦衣夜行！
陳龍盛話電競以示範項目躋身於今屆亞運會無疑係一項創舉，而香港選手喺其中一項電競賽事中奪得金牌更屬可喜可賀，然而喺缺乏電視台轉播之下，香港電競選手縱有佳績亦得唔到大眾嘅注目。
倡研公營頻道轉播賽事
佢話明白電競賽事轉播與否，商營電視台自有其考量，但政府既然願意投放一億元拓展電競，亦不妨多行一步，研究運用公營電台數碼頻道轉播電競賽事嘅可行性，從而營造一個推廣平台。
四年後嘅亞運會，電競將列為正式項目，佢話到時透過電視轉播為香港選手打氣係好多電競迷期待嘅事，電競擁躉喜歡從網絡獲取資訊，電視台亦不妨善用自己平台。