政情：一舊雲做手術 四眼變單眼
立法會議員黃碧雲（一舊雲）變咗「獨眼龍」！本來係「四眼」嘅一舊雲尋日喺Facebook上載咗一張相，佢右眼貼上紗布，因乜解究？
佢喺Fb貼文話終於做完人生第一次全身麻醉手術。兩項眼手術做咗近兩小時，雖然手術前已做好心理準備，但打完針，入到手術室喺床上都驚到震震哋，做完手術清醒後，麻醉科醫生話佢初時血壓爆升至一百八十，落藥後佢失去知覺就唔識驚喇！
醫眼底撕裂黃斑病變
手術後又點呢？佢話血壓回落至一百五十二，仲係有啲高，要留院一晚，今日應可出院回家，繼續乖乖哋趴睡幾星期。佢仲話多謝姪兒尋日朝早陪佢入院，老公幫佢代課，亦都多謝大家關心問候代禱！
早前都講過一舊雲一向有飛蚊症，經常見到黑點或浮游物，好似有蚊飛來飛去。佢喺立法會休會前發現右眼睇嘢較以往矇，以為近視度數加深，驗眼先知係黃斑病變同眼底撕裂，所以今次手術係為佢更換眼球晶體兼修補撕裂。